3 JOHN Di tolu lede a John
Tangada ne hihi di lede deenei:John, tangada agoago hagau
Di haga modongoohia
Di tolu lede a John la ne hihi go “John, tangada madua daumaha” ang gi Tagi o di nohongo dabu go Gaius. John e hihi di lede deenei e hagaamu Gaius i dana hagamaamaa ne hai gi nia dama a Christ ala i golo. Gei mee e helekai hai baahi gi taane dono ingoo go Diotrephes.Di hagahonu di beebaa deenei:Di haga modongoohia (1-4)Di hagaamu a Gaius (5-8)Di hagahalaua Diotrephes (9-10)Di hagaamu a Demetrius (11-12)Di hagaodi di lede deenei (13-15)
3 John
1Mai tangada madua daumaha, ang gi Gaius dela e aloho huoloo iei au. a2Dogu ihoo hagaaloho nei, au e dalodalo gi gila goe i nia hagadilinga mee huogodoo, ge gi maaloo labelaa goe, gadoo be doo maaloo i di baahi gi di hagataalunga. 3Au gu tentene huoloo i di madagoaa tau duaahina daumaha ne loomoi, ga helekai aga i doo manawa dahi gi di tonu, gadoo be doo mouli i di tonu i nia madagoaa huogodoo. 4Au e tentene huoloo giibeni i dogu longono eau bolo agu dama hagaaloho gu mouli i di tonu.
Gaius la gu hagaamu
5Dogu ihoo hagaaloho nei, e humalia go doo manawa dahi gi nia hegau humalia ala ne hai kooe gi tau duaahina daumaha aalaa, maeaha maa digaula digau mai i daha. 6Digaula e helehelekai gi di nohongo dabu deenei i di hai o doo aloho. Malaa, au e dangi adu gi di goe, bolo goe gi hagamaamaa ina labelaa digaula gi mee di nadau lloo adu hua beelaa i nia hagadilinga mee ala e haga tentene di manawa o God. 7I di nadau daamada ga hagadele nnegau a Christ, gei digaula hagalee hiihai e kae di nadau hagamaamaa mai baahi digau tuadimee. 8Malaa, gidaadou ala digau gu hagadonu gi hagamaamaa ina digau beenei, gi hai mee gidaadou ngaadahi gi nadau hegau i di tonu.Diotrephes mo Demetrius
9Au ne hihi dagu lede bodobodo gi di nohongo dabu, gei Diotrephes dela e hiihai bolo e hai di nadau dagi, la gu hagalee hagalongo mai gi agu helekai. 10Malaa, i dogu hanadu, gei au ga haga modongoohia aga nia mee huogodoo a maa ala ne hai, nia hagadilinga huaidu ala ne helehelekai iei mee i gimaadou, mo nia helekai tilikai a mee ne helekai ai. Hagalee bolo aanei hua, gei mee digi benebene humalia labelaa madau duaahina i di nadau lloomoi, gei e bule labelaa digau ala belee benebene digaula, gei e hagamada labelaa bolo e hagabagi digaula gi daha mo di nohongo dabu!11Dogu ihoo hagaaloho nei, hudee daudalia di mee huaidu, daudalia hua go di mee dela e humalia. Tangada ga haihai nia mee humalia, geia di tama ni God, gei tangada dela e hai nia mee huaidu, geia e de iloo ia a God.
12Nia daangada huogodoo e helehelekai humalia i Demetrius. Gei di mee dela e donu e hagahumalia a mee labelaa. Gimaadou e helekai humalia i mee labelaa, gei goodou gu iloo bolo madau haga modongoohia le e donu.
Nia hagaaloho haga muliagina
13Nia mee logowaahee i golo belee hagi adu gi di goe, gei au hagalee hiihai bolo ma e hihi gi nia inki mo nia mee hihi mee. 14Au e hagadagadagagee bolo au ga heetugi adu laa hoohoo mai, gei gidaua ga hagabooboo ai.15Di aumaalia gi madalia goe. Oo ehoo hagaaloho e hagau adu di nadau hagaaloho, gei goe ga hagadae labelaa gi tadau ihoo huogodoo.
Copyright information for
KPG